1 Mahāpadānasutta
1.1 Pubbenivāsapaṭisaṃyuttakathā- 1.2 Bodhisattadhammatā
- 1.3 Dvattiṃsamahāpurisalakkhaṇā
- 1.4 Vipassīsamaññā
- 1.5 Jiṇṇapurisa
- 1.6 Byādhitapurisa
- 1.7 Kālaṅkatapurisa
- 1.8 Pabbajita
- 1.9 Bodhisattapabbajjā
- 1.10 Mahājanakāyaanupabbajjā
- 1.11 Bodhisattaabhinivesa
- 1.12 Brahmayācanakathā
- 1.13 Aggasāvakayuga
- 1.14 Mahājanakāyapabbajjā
- 1.15 Purimapabbajitānaṃ dhammābhisamaya
- 1.16 Cārikāanujānana
- 1.17 Devatārocana
2 Mahānidānasutta- 3 Mahāparinibbānasutta
- 4 Mahāsudassanasutta
- 5 Janavasabhasutta
- 6 Mahāgovindasutta
- 7 Mahāsamayasutta
- 8 Sakkapañhasutta
- 9 Mahāsatipaṭṭhānasutta
- 10 Pāyāsisutta
1.15 Purimapabbajitānaṃ dhammābhisamaya
Loading...
Mahāpadānasutta
Purimapabbajitānaṃ dhammābhisamaya
82.
167Assosuṃ kho, bhikkhave, tāni purimāni caturāsītipabbajitasahassāni— ‘vipassī kira bhagavā arahaṃ sammāsambuddho bandhumatiṃ rājadhāniṃ anuppatto kheme migadāye viharati, dhammañca kira desetī’ti. Atha kho, bhikkhave, tāni caturāsītipabbajitasahassāni yena bandhumatī rājadhānī yena khemo migadāyo yena vipassī bhagavā arahaṃ sammāsambuddho tenupasaṅkamiṃsu; upasaṅkamitvā vipassiṃ bhagavantaṃ arahantaṃ sammāsambuddhaṃ abhivādetvā ekamantaṃ nisīdiṃsu.
83.
168Tesaṃ vipassī bhagavā arahaṃ sammāsambuddho anupubbiṃ kathaṃ kathesi. Seyyathidaṃ— dānakathaṃ sīlakathaṃ saggakathaṃ kāmānaṃ ādīnavaṃ okāraṃ saṃkilesaṃ nekkhamme ānisaṃsaṃ pakāsesi. Yadā te bhagavā aññāsi kallacitte muducitte vinīvaraṇacitte udaggacitte pasannacitte, atha yā buddhānaṃ sāmukkaṃsikā dhammadesanā, taṃ pakāsesi— dukkhaṃ samudayaṃ nirodhaṃ maggaṃ. Seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya; evameva tesaṃ caturāsītipabbajitasahassānaṃ tasmiṃyeva āsane virajaṃ vītamalaṃ dhammacakkhuṃ udapādi— ‘yaṃ kiñci samudayadhammaṃ sabbaṃ taṃ nirodhadhamman’ti.
84.
169Te diṭṭhadhammā pattadhammā viditadhammā pariyogāḷhadhammā tiṇṇavicikicchā vigatakathaṃkathā vesārajjappattā aparappaccayā satthusāsane vipassiṃ bhagavantaṃ arahantaṃ sammāsambuddhaṃ etadavocuṃ— ‘abhikkantaṃ, bhante, abhikkantaṃ, bhante. Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya— “cakkhumanto rūpāni dakkhantī”ti; evamevaṃ bhagavatā anekapariyāyena dhammo pakāsito. Ete mayaṃ, bhante, bhagavantaṃ saraṇaṃ gacchāma dhammañca bhikkhusaṃghañca. Labheyyāma mayaṃ, bhante, bhagavato santike pabbajjaṃ labheyyāma upasampadan’ti.
85.
170Alatthuṃ kho, bhikkhave, tāni caturāsītipabbajitasahassāni vipassissa bhagavato arahato sammāsambuddhassa santike pabbajjaṃ alatthuṃ upasampadaṃ. Te vipassī bhagavā arahaṃ sammāsambuddho dhammiyā kathāya sandassesi samādapesi samuttejesi sampahaṃsesi; saṅkhārānaṃ ādīnavaṃ okāraṃ saṃkilesaṃ nibbāne ānisaṃsaṃ pakāsesi. Tesaṃ vipassinā bhagavatā arahatā sammāsambuddhena dhammiyā kathāya sandassiyamānānaṃ samādapiyamānānaṃ samuttejiyamānānaṃ sampahaṃsiyamānānaṃ nacirasseva anupādāya āsavehi cittāni vimucciṃsu.