1.7.6 Paṭippassambhetabbatecattālīsaka

329Pañcahi, bhikkhave, aṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ. Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati—  imehi kho, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ.

330Aparehipi, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ. Yāya āpattiyā saṃghena, pāpikāya diṭṭhiyā appaṭinissagge, ukkhepanīyakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ; kammaṃ na garahati, kammike na garahati—  imehi kho, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ…pe… .

331Aṭṭhahi, bhikkhave, aṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ. Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti—  imehi kho, bhikkhave, aṭṭhahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambhetabbaṃ.

333Evañca pana, bhikkhave, paṭippassambhetabbaṃ. Tena, bhikkhave, pāpikāya diṭṭhiyā appaṭinissagge, ukkhepanīyakammakatena bhikkhunā saṃghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo—  ‘ahaṃ, bhante, saṃghena, pāpikāya diṭṭhiyā appaṭinissagge, ukkhepanīyakammakato sammā vattāmi, lomaṃ pātemi, netthāraṃ vattāmi, pāpikāya diṭṭhiyā appaṭinissagge, ukkhepanīyassa kammassa paṭippassaddhiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṃgho ñāpetabbo— 

334‘Suṇātu me, bhante, saṃgho. Ayaṃ itthannāmo bhikkhu saṃghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge, ukkhepanīyassa kammassa paṭippassaddhiṃ yācati. Yadi saṃghassa pattakallaṃ, saṃgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambheyya. Esā ñatti.

335Suṇātu me, bhante, saṃgho. Ayaṃ itthannāmo bhikkhu saṃghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge, ukkhepanīyassa kammassa paṭippassaddhiṃ yācati. Saṃgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambheti. Yassāyasmato khamati itthannāmassa bhikkhuno, pāpikāya diṭṭhiyā appaṭinissagge, ukkhepanīyassa kammassa paṭippassaddhi, so tuṇhassa; yassa nakkhamati, so bhāseyya.

336Dutiyampi etamatthaṃ vadāmi…pe…  tatiyampi etamatthaṃ vadāmi—  suṇātu me, bhante, saṃgho. Ayaṃ itthannāmo bhikkhu saṃghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṃ yācati. Saṃgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṃ paṭippassambheti. Yassāyasmato khamati itthannāmassa bhikkhuno, pāpikāya diṭṭhiyā appaṭinissagge, ukkhepanīyassa kammassa paṭippassaddhi, so tuṇhassa; yassa nakkhamati, so bhāseyya.

337Paṭippassaddhaṃ saṃghena itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṃ. Khamati saṃghassa, tasmā tuṇhī, evametaṃ dhārayāmī’”ti.

340 Paṇḍulohitakā bhikkhū,

sayaṃ bhaṇḍanakārakā;

Tādise upasaṅkamma,

ussahiṃsu ca bhaṇḍane.

341 Anuppannāpi jāyanti,

uppannānipi vaḍḍhare;

Appicchā pesalā bhikkhū,

ujjhāyanti padassato.

342 Saddhammaṭṭhitiko buddho,

sayambhū aggapuggalo;

Āṇāpesi tajjanīya,

kammaṃ sāvatthiyaṃ jino.

343 Asammukhāppaṭipucchāp-

paṭiññāya katañca yaṃ;

Anāpatti adesane,

desitāya katañca yaṃ.

344 Acodetvā asāretvā,

anāropetvā ca yaṃ kataṃ;

Asammukhā adhammena,

vaggena cāpi yaṃ kataṃ.

345 Appaṭipucchā adhammena,

puna vaggena yaṃ kataṃ;

Appaṭiññāya adhammena,

vaggena cāpi yaṃ kataṃ.

346 Anāpatti adhammena,

vaggena cāpi yaṃ kataṃ;

Adesanāgāminiyā,

adhammavaggameva ca.

347 Desitāya adhammena,

vaggenāpi tatheva ca;

Acodetvā adhammena,

vaggenāpi tatheva ca.

348 Asāretvā adhammena,

vaggenāpi tatheva ca;

Anāropetvā adhammena,

vaggenāpi tatheva ca.

349 Kaṇhavāranayeneva,

sukkavāraṃ vijāniyā;

Saṃgho ākaṅkhamāno ca,

yassa tajjanīyaṃ kare.

350 Bhaṇḍanaṃ bālo saṃsaṭṭho,

adhisīle ajjhācāre;

Atidiṭṭhivipannassa,

saṃgho tajjanīyaṃ kare.

351 Buddhadhammassa saṃghassa,

avaṇṇaṃ yo ca bhāsati;

Tiṇṇannampi ca bhikkhūnaṃ,

saṃgho tajjaniyaṃ kare.

352 Bhaṇḍanaṃ kārako eko,

bālo saṃsagganissito;

Adhisīle ajjhācāre,

tatheva atidiṭṭhiyā.

353 Buddhadhammassa saṃghassa,

avaṇṇaṃ yo ca bhāsati;

Tajjanīyakammakato,

evaṃ sammānuvattanā.

354 Upasampadanissayā,

sāmaṇeraṃ upaṭṭhanā;

Ovādasammatenāpi,

na kare tajjanīkato.

355 Nāpajje tañca āpattiṃ,

tādisañca tato paraṃ;

Kammañca kammike cāpi,

na garahe tathāvidho.

356 Uposathaṃ pavāraṇaṃ,

pakatattassa naṭṭhape;

Savacaniṃ anuvādo,

okāso codanena ca.

357 Sāraṇaṃ sampayogañca,

na kareyya tathāvidho;

Upasampadanissayā,

sāmaṇeraṃ upaṭṭhanā.

358 Ovādasammatenāpi,

pañcahaṅgehi na sammati;

Tañcāpajjati āpattiṃ,

tādisañca tato paraṃ.

359 Kammañca kammike cāpi,

garahanto na sammati;

Uposathaṃ pavāraṇaṃ,

savacanīyā ca novādo.

360 Okāso codanañceva,

sāraṇā sampayojanā;

Imehaṭṭhaṅgehi yo yutto,

tajjanānupasammati.

361 Kaṇhavāranayeneva,

sukkavāraṃ vijāniyā;

Bālo āpattibahulo,

saṃsaṭṭhopi ca seyyaso.

362 Niyassakammaṃ sambuddho,

āṇāpesi mahāmuni;

Kīṭāgirismiṃ dve bhikkhū,

assajipunabbasukā.

363 Anācārañca vividhaṃ,

ācariṃsu asaññatā;

Pabbājanīyaṃ sambuddho,

kammaṃ sāvatthiyaṃ jino;

Macchikāsaṇḍe sudhammo,

cittassāvāsiko ahu.

364 Jātivādena khuṃseti,

sudhammo cittupāsakaṃ;

Paṭisāraṇīyakammaṃ,

āṇāpesi tathāgato.

365 Kosambiyaṃ channaṃ bhikkhuṃ,

Nicchantāpattiṃ passituṃ;

Adassane ukkhipituṃ,

Āṇāpesi jinuttamo.

366 Channo taṃyeva āpattiṃ,

paṭikātuṃ na icchati;

Ukkhepanāppaṭikamme,

āṇāpesi vināyako.

367 Pāpadiṭṭhi ariṭṭhassa,

āsi aññāṇanissitā;

Diṭṭhiyāppaṭinissagge,

ukkhepaṃ jinabhāsitaṃ.

368 Niyassakammaṃ pabbajjaṃ,

tatheva paṭisāraṇī;

Adassanāppaṭikamme,

anissagge ca diṭṭhiyā.

369 Davānācārūpaghāti,

micchāājīvameva ca;

Pabbājanīyakammamhi,

atirekapadā ime.

370 Alābhāvaṇṇā dve pañca,

dve pañcakāti nāmakā;

Paṭisāraṇīyakammamhi,

atirekapadā ime.

371 Tajjanīyaṃ niyassañca,

duve kammāpi sādisā;

Pabbajjā paṭisārī ca,

atthi padātirittatā.

372 Tayo ukkhepanā kammā,

sadisā te vibhattito;

Tajjanīyanayenāpi,

sesakammaṃ vijāniyāti.