1.6 Parābhavasutta

106Evaṃ me sutaṃ—  ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ gāthāya ajjhabhāsi— 

107 “Parābhavantaṃ purisaṃ,

mayaṃ pucchāma gotama;

Bhavantaṃ puṭṭhumāgamma,

kiṃ parābhavato mukhaṃ”. (1)

108 “Suvijāno bhavaṃ hoti,

suvijāno parābhavo;

Dhammakāmo bhavaṃ hoti,

dhammadessī parābhavo”. (2)

109 “Iti hetaṃ vijānāma,

paṭhamo so parābhavo;

Dutiyaṃ bhagavā brūhi,

kiṃ parābhavato mukhaṃ”. (3)

110 “Asantassa piyā honti,

sante na kurute piyaṃ;

Asataṃ dhammaṃ roceti,

taṃ parābhavato mukhaṃ”. (4)

111 “Iti hetaṃ vijānāma,

dutiyo so parābhavo;

Tatiyaṃ bhagavā brūhi,

kiṃ parābhavato mukhaṃ”. (5)

112 “Niddāsīlī sabhāsīlī,

anuṭṭhātā ca yo naro;

Alaso kodhapaññāṇo,

taṃ parābhavato mukhaṃ”. (6)

113 “Iti hetaṃ vijānāma,

tatiyo so parābhavo;

Catutthaṃ bhagavā brūhi,

kiṃ parābhavato mukhaṃ”. (7)

114 “Yo mātaraṃ pitaraṃ vā,

jiṇṇakaṃ gatayobbanaṃ;

Pahu santo na bharati,

taṃ parābhavato mukhaṃ”. (8)

115 “Iti hetaṃ vijānāma,

catuttho so parābhavo;

Pañcamaṃ bhagavā brūhi,

kiṃ parābhavato mukhaṃ”. (9)

116 “Yo brāhmaṇaṃ samaṇaṃ vā,

Aññaṃ vāpi vanibbakaṃ;

Musāvādena vañceti,

Taṃ parābhavato mukhaṃ”. (10)

117 “Iti hetaṃ vijānāma,

Pañcamo so parābhavo;

Chaṭṭhamaṃ bhagavā brūhi,

Kiṃ parābhavato mukhaṃ”. (11)

118 “Pahūtavitto puriso,

Sahirañño sabhojano;

Eko bhuñjati sādūni,

Taṃ parābhavato mukhaṃ”. (12)

119 “Iti hetaṃ vijānāma,

Chaṭṭhamo so parābhavo;

Sattamaṃ bhagavā brūhi,

Kiṃ parābhavato mukhaṃ”. (13)

120 “Jātitthaddho dhanatthaddho,

Gottatthaddho ca yo naro;

Saññātiṃ atimaññeti,

Taṃ parābhavato mukhaṃ”. (14)

121 “Iti hetaṃ vijānāma,

Sattamo so parābhavo;

Aṭṭhamaṃ bhagavā brūhi,

Kiṃ parābhavato mukhaṃ”. (15)

122 “Itthidhutto surādhutto,

Akkhadhutto ca yo naro;

Laddhaṃ laddhaṃ vināseti,

Taṃ parābhavato mukhaṃ”. (16)

123 “Iti hetaṃ vijānāma,

Aṭṭhamo so parābhavo;

Navamaṃ bhagavā brūhi,

Kiṃ parābhavato mukhaṃ”. (17)

124 “Sehi dārehi asantuṭṭho,

Vesiyāsu padussati;

Dussati paradāresu,

Taṃ parābhavato mukhaṃ”. (18)

125 “Iti hetaṃ vijānāma,

Navamo so parābhavo;

Dasamaṃ bhagavā brūhi,

Kiṃ parābhavato mukhaṃ”. (19)

126 “Atītayobbano poso,

Āneti timbarutthaniṃ;

Tassā issā na supati,

Taṃ parābhavato mukhaṃ”. (20)

127 “Iti hetaṃ vijānāma,

Dasamo so parābhavo;

Ekādasamaṃ bhagavā brūhi,

Kiṃ parābhavato mukhaṃ”. (21)

128 “Itthiṃ soṇḍiṃ vikiraṇiṃ,

Purisaṃ vāpi tādisaṃ;

Issariyasmiṃ ṭhapeti,

Taṃ parābhavato mukhaṃ”. (22)

129 “Iti hetaṃ vijānāma,

Ekādasamo so parābhavo;

Dvādasamaṃ bhagavā brūhi,

Kiṃ parābhavato mukhaṃ”. (23)

130 “Appabhogo mahātaṇho,

Khattiye jāyate kule;

So ca rajjaṃ patthayati,

Taṃ parābhavato mukhaṃ. (24)

131 Ete parābhave loke,

Paṇḍito samavekkhiya;

Ariyo dassanasampanno,

Sa lokaṃ bhajate sivan”ti. (25)