1 Khandhasaṃyutta
2 Rādhasaṃyutta- 3 Diṭṭhisaṃyutta
- 4 Okkantasaṃyutta
- 5 Uppādasaṃyutta
- 6 Kilesasaṃyutta
- 7 Sāriputtasaṃyutta
- 8 Nāgasaṃyutta
- 9 Supaṇṇasaṃyutta
- 10 Gandhabbakāyasaṃyutta
- 11 Valāhakasaṃyutta
- 12 Vacchagottasaṃyutta
- 13 Jhānasaṃyutta
1.1.1.4 Dutiyahāliddikānisutta
Loading...
Khandhasaṃyutta
Mūlapaṇṇāsaka
Nakulapituvagga
Dutiyahāliddikānisutta
4.
54Evaṃ me sutaṃ— ekaṃ samayaṃ āyasmā mahākaccāno avantīsu viharati kuraraghare papāte pabbate. Atha kho hāliddikāni gahapati yenāyasmā mahākaccāno…pe… ekamantaṃ nisinno kho hāliddikāni gahapati āyasmantaṃ mahākaccānaṃ etadavoca— “vuttamidaṃ, bhante, bhagavatā sakkapañhe— ‘ye te samaṇabrāhmaṇā taṇhāsaṅkhayavimuttā, te accantaniṭṭhā accantayogakkhemino accantabrahmacārino accantapariyosānā seṭṭhā devamanussānan’ti.
55Imassa nu kho, bhante, bhagavatā saṃkhittena bhāsitassa kathaṃ vitthārena attho daṭṭhabbo”ti?
56“Rūpadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā ‘cittaṃ suvimuttanti’ vuccati.
57Vedanādhātuyā kho, gahapati… saññādhātuyā kho, gahapati… saṅkhāradhātuyā kho, gahapati… viññāṇadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā ‘cittaṃ suvimuttanti’ vuccati.
58Iti kho, gahapati, yaṃ taṃ vuttaṃ bhagavatā sakkapañhe— ‘ye te samaṇabrāhmaṇā taṇhāsaṅkhayavimuttā te accantaniṭṭhā accantayogakkhemino accantabrahmacārino accantapariyosānā seṭṭhā devamanussānan’ti.
59Imassa kho, gahapati, bhagavatā saṃkhittena bhāsitassa evaṃ vitthārena attho daṭṭhabbo”ti.
60Catutthaṃ.